आदरणीय दादासाहेब रुपवते , यशवंतराव भांगरे , भाऊसाहेब हांडे आणि अन्य तोलामोलाच्या तालुक्यातील शैक्षणिक धुरिणांनी एकत्र येत हा शैक्षणिक संस्था रुपी जगन्नाथाचा रथ घडवलाही अन् यशस्वीपणे पुढेपुढे नेला देखील
उदिष्ट होते कष्टकरी - शेतकरी , कामगार , गरीबगुरीबांची लेकरं - लेकीबाळी शिकाव्यात. उच्च शिक्षित व्हाव्यात. तालुक्यातच शिकाव्यात. उद्दिष्ट होते पैशाअभावी - गरीबीने गांजल्या कारणाने शिकणे थांबू नये. थबकू नये. कुठे मोठ्या शहरांकडे जाऊ शकत होती मुलं संगमनेरला नगरला पुणे - नाशिक - की मुंबई गं नगरी बडीबाका महानगरी मुंबईला अशक्य अशक्य केवळ अशक्यच काय पण कल्पना देखील करु शकत नव्हती अशी आपल्या तालुक्याची तत्कालीन परिस्थिती.
लेकीबाळी , मुलं गोळा करावीत. राहण्याची सुविधा करावी. धान्य जमा व्हावे. तेलामीठाची व्यवस्था व्हावी. हातातोंडाशी घासाची गाठ पडावी. शिक्षणाची आस लागावी. सर्वसामान्यांच्या मुलांसाठी उच्च शिक्षणाची महाविद्यालयीन सुविधा आणि तब्बल पन्नास वर्षांच्या वाटचालीत तालुक्यातील खेड्यापाड्यात माध्यमिक शिक्षणासह तालुक्याच्या गांवी तंत्र शिक्षणाची झेप हे संस्थेच्या शिरपेचातील एकप्रकारे सुवर्णपीस आहे...
विविध उद्दिष्टांसह फाटक्या संसारातील फाटक्या माणसाला शिक्षणाच्या प्रवाहात आणून विविध क्षेत्रात सन्मानाने उभे करण्याचे तोलामोलाचे उद्दिष्ट सफल झाले आहे ही संस्मरणीय बाब...